Neiry biotexnologiya laboratoriyasi mutaxassislari Moskva davlat universiteti olimlari bilan hamkorlikda “dunyoda birinchi marta” hayvon miyasini sunʼiy intellektga ulashga erishdi. Bu haqda Neiry matbuot xizmati xabar bermoqda.

Olimlar kalamush miyasiga invaziv neyrointerfeysni implantatsiya qilishdi. Uning elektrodlari miyaning alohida qismlarini maʼlum tarzda rag‘batlantirishga imkon beradi. Interfeys esa neyron tarmog‘iga asoslangan algoritm bilan birgalikda ishlaydi. Shu tufayli olimlar Pifiya ismli kalamushga turli savollar berishi, sunʼiy intellekt algoritmi esa miyaga elektr bilan taʼsir qilish orqali unga to‘g‘ri javoblarni “aytib turishi” mumkin.

Sunʼiy intellektdan “maslahat” olayotgan paytida kalamush ijobiy yoki salbiy javob berish kerak bo‘lgan hollarda maʼlum his-tuyg‘ularni boshdan kechiradi. “Qorin sohasida o‘zgarish sezsa, bu “yo‘q” javobi, yurak qismida his qilsa, bu “ha” javobi bo‘ladi”, - deydi Moskva davlat universiteti Sunʼiy intellekt institutining invaziv neyron tarmoq interfeyslarini ishlab chiqish bo‘yicha rahbari Vasiliy Popkov.

Neiry laboratoriyasi saytida joylangan videoda Pifiyaning turli savollarga qanday javob berayotganini ko‘rish mumkin. Masalan, undan “Sen kalamushmisan?” deb so‘rashganda, u “Ha” tugmasini, “Ikki karra ikki - beshmi?” degan savolga esa “Yo‘q” tugmasini bosadi. Albatta, har bir to‘g‘ri javob uchun kalamush mukofot oladi. Tadqiqotchilarning aytishicha, Pifiya fizika, tarix, matematikadan har qanday savolga to‘g‘ri javob bera oladi. U allaqachon kvazarlar, Python dasturlash tili, miyelin qobiqlari va boshqa mavzulardagi savollarga ko‘plab to‘g‘ri javoblar berishga ulgurgan. Bu tabiiy, chunki javoblarni unga unʼiy intellekt yetkazyapti.

“Yaqin kelajakda neyrointerfeys implant qilingan har qanday odam ham xuddi shunday qila oladi”, - deya qo‘shimcha qildi Neiry matbuot xizmati. Ushbu loyihaga rahbarlik qilayotgan Moskva davlat universiteti professori Mixail Lebedev sodir bo‘layotgan voqealarni inson va sunʼiy intellektning “tinch-totuv yashashi”ga imkon beradigan inqilob deb baholamoqda. Olimlar ishonchiga ko‘ra, bunday yondashuv katta hajmdagi maʼlumotlarni eslab qolish va qayta ishlash uchun sunʼiy intellekt algoritmlarini qo‘llash, shuningdek, ularni keyinchalik miyaga uzatish imkonini beradi. Miya esa o‘z navbatida ijodkorlik, intuitsiya va ong bilan bog‘liq vazifalar bilan shug‘ullanadi.